ونسٹن چرچل کا قول یاد آرہا ہے

بھٹو صاحب کی مندرجہ ذیل تقریر پر تاریخ و زمینی حقائق سے ناآشنا لوگ بہت واہ واہ کرتے ہیں کہ کیا ہی مضبوط لیڈر تھا۔ جس میں وہ انتہائی مغرور انداز میں قرارداد پھاڑ کر اٹھ کر چلے آتے ہیں۔ کسی نے لکھا کہ ہمیں تو ایسے ہی نڈر لیڈرز کی ضرورت ہے۔

اب یہ ویڈیو جس طرح سیاق و سباق سے ہٹ کر لگائی گئی ہے یہ واقع میں کوئی بہت بڑا کارنامہ لگتی ہے لیکن اگر میں آپ کو بتاؤں کہ یہ شعبدہ بازی بھٹو صاحب نے تب کی تھی جب ہمارے ملک کا بدترین سانحہ رونما ہو رہا تھا؟ جی، بالکل، یہ قرارداد پھاڑنے کا احمقانہ فیصلہ اسی وقت کیا گیا تھا جب سقوطِ ڈھاکہ ایسے تھا کہ اب ہوا اور اب ہوا۔ شاید ان کی واہ واہ کرنے والوں کو پتہ بھی نہ ہو کہ یہ قرارداد تھی کس متعلق؟ یہ اسی جنگ کے پرامن حل کے متعلق تھی۔

جب بھٹو صاحب اقوامِ متحدہ سلامتی کونسل پہنچے تھے تو پاکستان کو ساتھیوں کی شدید ضرورت تھی کیونکہ پاکستانی فوج کو مشرقی پاکستان میں مکتی باہنی اور ہندوستانی فوج کی جانب سے چن چن کر مارا جا رہا تھا۔ امریکہ جو اس وقت ہمارا اتحادی تھا، اس کے وزیرِ خارجہ نے بھٹو سے کہا کہ “مسٹر بھٹو ہم آپ کے ساتھ ہیں لیکن بہتر ہے کہ آپ دیگر ممالک کے نمائندوں کو بھی قائل کرلیں” بھٹو نہ جانے اس یقین دہانی کو سن کر کتنی امیدیں وابستہ کر بیٹھیں تھے کہ انہوں نے تقریر کے دوران کسی بھی ہدایت کا خیال نہ کیا جو کہ امریکی وزیرِ خارجہ نے انھیں کی تھی کہ “عملی بات کیجیے گا یہ وقت تاریخی کتب میں تقریریں چھپوانے کا نہیں” بلکہ وہ جذباتی باتیں کرتے رہے اور ہندوستان اور پاکستان کے تعلقات کی تفصیل میں ہی گھس گئے۔ اس کے بعد پھر بھی دو حل سلامتی کونسل نے پیش کیے۔ ایک مستقل ارکان کی جانب سے تھا یعنی فرانس اور برطانیہ اور دوسرا غیر مستقل ارکان کی جانب سے تھا جو کہ اس وقت پولینڈ تھا۔ ان دونوں حل کی تفصیلات یہ تھیں کہ پولینڈ نے کہا تھا کہ لڑائی کو فوراً روک دیا جائے اور پاکستان پر شیخ مجیب الرحمٰن کی حکومت تسلیم کرلی جائے اور مشرقی پاکستان کے متعلق پارلیمانی فیصلہ کریں جبکہ برطانیہ اور فرانس نے یہ کہا کہ دونوں افواج لڑائی روک دیں۔ ہندوستانی فوج اور پاکستانی فوج دونوں مشرقی پاکستان خالی کردیں اور وہاں اقوامِ متحدہ کی انسانی امداد کے عملے کو بھیجا جائے اور بعد ازاں تینوں فریقین بیٹھ کر یہ فیصلہ کرلیں کہ مستقبل کا لائحہ عمل کیا ہوگا۔

اب ویسے تو پولینڈ کی قرارداد بھی کوئی زیادہ غلط نہیں تھی لیکن ظاہر ہے بھٹو صاحب کی ہوسِ اقتدار اور انا کو مدنظر رکھتے ہوئے اس کا قبول ہونا تو ممکن نہ تھا لیکن برطانیہ اور فرانس کی آفر اگر حالات کے مطابق دیکھا جاتا تو مناسب تھی لیکن شاید بھٹو صاحب کسی اور قسم کی ہواؤں میں اڑ رہے تھے۔ انہوں نے دونوں قراردادیں پھاڑیں اور وہاں انگریزی میں چار جملے کہے اور چلتے بنے۔ ان جملوں میں کہی گئی باتیں واضح دھمکیاں تھیں جیسے “چاہو تو ہم پر “معاہدہ ءِ ورسائلز” سے بدتر پابندیاں عائد کردو” “چاہو تو ہم پہ حملے اور قابض ہونے کی اجازت دے دو” “لیکن ہم ایسی ذلت آمیز شرائط قبول نہیں کریں گے” وغیرہ وغیرہ۔ شاید وہ چاہتے تھے کہ ہندوستانی فوج کو مشرقی پاکستان سے نکلنے کا حکم ملے اور اسے پاکستان کا اندرونی معاملہ قرار دے دیا جائے لیکن ایسا ہوا نہیں۔